" یاشماقچیلارلا یاشماقسیز دانیشیق"
بوگون آذربایجاندا کیتاب یایين آلانیندا یاشماق درگیسی نین تایسیز و تاریخی دیری و گؤروی دانیلمازدیر. یاشماق باشليغی یاشماقچیلارا تحمیل اولموشسادا اونلارین ادبیاتیمیزدا یاشماقسیز و مدرن ایز بوراخدیقلاری آچیق-آیدیندیر. یاشماق سيرا کیتابلاریندا شعر و اؤیکو و رومانلار اوست-اوسته ادبیاتیمیزدا اؤزللیکله شعریمیزده مدرن و پست-مدرن پارلاق ایزلرینی گؤز اؤنونه چکمکده دیر. و بونلارلا یاناشي کیتابلارین مضمونلاریله اویغون جیلدیلری نین تام یئنی طرح وگرافیک لری یاشماق سيرا کیتابلارینا سابیقه سیز بیر اؤزللیک وئرمیشدیر. بونا گؤره عزیزگرافیست و طراح مهیار آیخان بَیه اللرینه ساغلیق دئمک ان از بیر آلقیش اولا بیلر.یاشماقچیلار باشدا سایين باش رئداکتور سعید موغانلی باشقا آوانگارد امکداشلاریلا بیرلیکده مدرن ادبیاتیمیزین پارلاق نمونه رینی تانیتدیرماسیندا و گلیشمه سینده تام فداکارلیقلا آجي-آغریلارا قاتلاشدیقلاری اوچون آلقیشلانیب دستکلنمه لیدیرلر. یاشماق سيرا کیتابلاري بوگون بیربه بیر آراشدیریلیب اینجه له نیب دیرلری آچیقلانمالیدیر و اونلارین حاقیندا سوسقونون هئچ آنلامي یوخدور. بوگونه دک سعید بی بئله بیرگئنیش یایين گؤروینی اردم و باجاریقلا یئرینه چاتدیرمیشدیر. آتا بابالاردئمیشکن ایشین اولین نه دوست گؤرسون نه دوشمن. هرایش باشلانیشیندا چاتیشمامازلیقلارلا قارشی- قارشیادیر.اؤزللیکله بو یئنی یولدا عزیز اوانگارد یاشماقچیلار چوخ اینجه لیکله ودیقتله داورانیب و بو تاریخی گؤرولرینی اوغورلا ایره لی سورمه لیدیرلر. کیتابلار قيسا زاماندا دال با دال یایينلانیر و بو گئدیشده کیتابلارین سایي و کمیتی اونلارین کئیفیتینی سوروملایيب سای و کمیت رکوردو کئیفیتی اوستونله یه بیلر منجه. بو چاتیشمامازلیق دان باشقا بو سیرا کیتابلارین ایچینده بعضی اسکی اثرلرین یایينلانماسي گئت-گئده آرتیرسا یاشماقچیلارا اوغورسوزلوق قازانا بیلر. اوچونجو چاتیشمامازليق یاشماق سيرا کیتابلاریندا بعضی غیری کارشوناسانه اؤن سؤزلردیر. بو اؤن سؤزلر بعضا اغراق آمیز اولاراق یانليشليق لار یارادا بیلر. (اؤرنک اولاراق عزیز قارداشیمیز ووقار نعمتین رامیز روشنین "گؤی اوزو داش ساخلاماز" شعر توپلوسونا یازدیغی تحلیلدیر. نه ایسه یاخین گله جکده مدرن و اسکی اثرلری آراشدیریب تانیتدیرماغا چاليشاجاغام. بوگون بیز یاشماغا و یاشماقچیلارا گووه نیریک. بوگون یاشماق سيرا کیتابلاري تنقیدچیلریمیزین مدرن ادبیا تیمیزین نمونه لرینی آراشدیرماغا بؤیوک قایناق و ایمکان یاراتمیشدیر. من اؤزلوگومده یاشماقچیلارا بول-بول شانسلار و اوغورلار دیله ییب گئت-گئده باشقا مدرن اثرلرین یایينلانماسيني گؤزله ییرم.
تبریز 2008